لبنان
الوفاق نيوز تحاور سيدة الاعمال جيهان الياسين \ حاورها :بلال عثمان -عكار
بدايةً، ما هي شركة الأمانة الدولية؟ وما هي أبرز خدماتها أو مشاريعها؟
شركة الامانة الدولية هي شركة متخصصة بجمع ونقل النفايات من البلدات والقرى إلى مطمر سرار الرسمي الذي يملكه الحاج خلدون الياسين
أما شركة الامانة العربية فهي الشركة القائم عليها معمل الفرز والمطمر الصحي وهي الشركة المشغلة لهذه المنشأة الضخمة والذي سيتم تشغيلها عن قريب بإذن الله تعالى
التركيز قائم حالياً على جودة الخدمة التي نقدمها للبلدات ولاحقاً سنكون أصبح تركيزاً على الفرز من المصدر وعلى مشاريع لتحسين وحماية البيئية
- كيف وصلتِ إلى منصب المديرة العامة؟ وما أبرز التحديات التي واجهتيها في بداية العمل؟
وصلت لهيدا المنصب بعد سنين من الخبرة بالشغل الميداني والمتابعة الدقيقة لكل التفاصيل. واستفدت كتير من خبرة زوجي، كونه رئيس إدارة الشركتين والمالك الرسمي لمطمر سرار، ومن خبرتي أنا وقدرتي على إدارة الفريق. هيدا المزيج بين الخبرة والدعم والتجربة العملية عطاني الأساس القوي اللي خلّاني أقدر تحمّل مسؤولية هالدور بثقة وجديّة والتزام.
أول التحديات كانت بناء ثقة الناس
خصوصاً أن ملف النفايات ملف حساس، وبيطلب نفس طويل
لأن في تنوع بالتعاطي مع كم هائل من الناس وفي الوقت نفسو كمان لازم يكون في قدرة على الضبط .. وأهم بند هو المتابعة بدقة لأن عملنا يتطلب أمانة عالية لتقديم العمل المطلوب بشكل نظيف قدر المستطاع - ما الذي يميز عمل الشركة في عكار تحديدًا؟
عكار مش منطقة عادية هي محافظة كبيرة ،نطاقها واسع وبدها جهد كبير . اللي بيميز شغلنا هو القرب من الناس، والتواصل المستمر مع البلديات، وتقديم خدمات تتناسب مع طبيعة المنطقة وتحدياتها نحن دائماً بصدد تطوير الخدمات ويا رب نقدر دايماً
نكون على قدر المسؤولية
أسئلة عن علاقتها بالبلديات - شاهدنا لك زيارات عدّة إلى مجالس بلدية في عكار… ما الهدف من هذه الزيارات؟
كان الهدف الأول بجولتنا التهنئة والمباركة وتقديم الدعم خاصة بظل الظروف الحالية
الهدف الثاني كان مد جسور بينا وبين الرؤوساء الجدد دون وسطاء إنّو نسمع منهم مباشرة، نعرف احتياجات كل بلدة، ونعزّز الشراكة بينّا وبينهم
وكمان كرمال نبقى قراب منهم ونسق معهم لتقديم أفضل الخدمات - كيف تقيّمين التعاون بين الشركات الخاصة والبلديات في تطوير الخدمات؟
هيدا السؤال بالأخص بيعنيلنا كتير ومنآمن فيه كرمال هيك ادارة الشركة أطلقت شعار ( دمتم شركاء نجاح نعتز بهم )
وهيدا الشعار بيأكد إنو التعاون ضروري. يعني البلديات عندها المعرفة المحلية، والشركات عندها الإمكانات والخبرة. وقت يشتغلوا سوا، أكيد حتكون النتيجة أسرع وأفضل
أسئلة عن دور المرأة - كمديرة عامة… ما الرسالة التي توجهينها للنساء العاملات أو الراغبات بدخول مجال الإدارة؟
بقلهن: المرأة هي أساس المجتمع ..
هي الأم والأخت والزوجة والابنة والعمة والخالة !! ادارة المنزل شي كتير أساسي والست يلي قدرت تعمل مجتمع ما بينخاف عليها تشتغل معو
العمل للمرأة هو بمثابة الانتقال من ادارة داخلية إلى اداراة عامة طالما انو هي يلي بنيت الأساس
الإدارة الناجحة وين ما كانت
بدها بس شخصية قوية، معرفة، وثقة بالنفس… مش جنسنا هو يلي بيحدد قدراتنا !!!
المرأة قادرة توصل وتنجح بأي موقع إذا عندها الإرادة وبتعرف شو بدها ..
وأهم شي يكون في وجهة صحيحة وهدف محدد - هل تواجه المرأة صعوبات إضافية في المناصب القيادية في مناطق الأطراف مثل عكار؟
أكيد في صعوبات مش بس بعكار وين ما كانت رح يكون في صعوبات ، المرأة يمكن تضطر تتعب شوي زيادة لتثبت جدارتها ، بس وقت الناس يشوفوا نتيجة العمل الصحيح … بيصير تقديرها أكبر !!!
أسئلة عن التنمية المحلية - ما أهم الاحتياجات التي لمستِها خلال جولتك على بلدات عكار؟
الاحتياجات كتيرة صراحة عكار فعلياً منطقة محرومة وبحاجة كل شي بس فينا نذكر شوية منهم تحسين البنى التحتية، الطرقات ، دعم البلديات،
خلق فرص عمل للشباب، وتقوية العمل البيئي من فرز ومعالجة. وفي حاجة لمشاريع تنمية مستدامة تخفف الضغط عن البلدات. - هل لديكم مشاريع قادمة في المنطقة؟ وما الأولويات؟
أكيد بإذن الله في خطط لتوسيع خدماتنا أول شي بطريقة الجمع والنقل وأهم شي تشغيل معمل الفرز
وكمان من ضمن الخطط القريبة مشاريع خضراء رح نعلن عنها قريباً. أولويتنا إنو نرفع مستوى الخدمة البيئية بعكار ونغطي أكتر عدد ممكن من البلدات
أسئلة ختامية - كيف ترين مستقبل التعاون بين القطاع الخاص والمجتمع المحلي؟
للأمانة قد ما مرق وجع على هالبلد صرنا نستحي من حالنا بس كمان ما لازم نفقد روح العزيمة والإصرار بمستقبل واعد.
وقت يكون الشغل شفاف وفيه ثقة، القطاع الخاص بيقدّر يساعد كتير ويفتح فرص عمل ويطوّر الخدمات للمجتمع كله. - كلمة أخيرة لأهالي عكار وللمشاهدين.
أهالي عكار إلهم محبّة خاصة بقلبي. بشكرن على تعاونن وثقتن، وبوعد إنّو نكفّي بشغل جدّي ومسؤول لنخلي عكار نموذج بالتنمية البيئية والخدمات
تقرير :بلال عثمان -عكار
الوفاق نيوز
